In einer etwas
anderen Art von Pfarrer Johann Wurzer
|
|
Eröffnung:
Friara woa de Mess Latein
Des braucht beschtimmt hei nimma sein
In Hochdeitsch homm as donn prowiert
Owa homm ma des net recht kapiert??
Hiazt probia i hoit moi Dialekt –
Weu vom mostvierl do hob i Reschoekt …
Und es is wieda Foschingszeit,
mit Musi, Jubl Heitakeit
da Kirchnchor, der reisst si zomm
dea singt heit a in Gottes Nom
Ernst und Gaudi nebnanond
Oam und Kronk sei, is koa Schond
Da Paulus sogts gonz deitli heit
Fia Judn wa des nur Torheit
Fian Christn is des Kreiz koa Schond –
Weu Glauben is net nua Vaschtond
Da Jesus sogt gonz deitli dia
Mitn Herrgott konnst di proin as wia
KYRIE
Bevor der Herr in unsra Mittn
Woinn ma eam um Vagebung bittn
Vagessn hom ma af de Oamen
Herrgott, zoag uns die Erbormen Alle:----
Hom baut af’d Mocht und seine Normen –
Christus zoag uns die Erbormen Alle:----
Woitn nua mehr unsan Body formen
Herrgott, zoag uns die Erbormen Alle ---
Erboam di unsa, loss d’ Sündn noch bau uns auf,
weu mia san schwoch –
Dass mia zum Herrn in Hümmi kamen
Heit und a in Ewigkeit -- Amen
GLORIA
Ois Katholik brauchst net traurig sei
Wea in Jesus kennt, dea konn si gfrei
Drum sing ma volla Stoiz und Freid
Begeistat a des Gloria heit.
Tagesgebet
Es is net zam fossn, kam zam glaum
Wea glaubt wiad ondre net ausraum
Weu selig san de oamen Leit
Und de, die leben Barmherzigkeit
Wea Friedn stift, dea gheat zam Herrn
Da Herrgott hot des Mitleid gern
Wea koan a Gwoit tuat, erbt des Lond
Wea vafoigt wird, dea gschpiat Gottes Hond
Gfreits en und lobts laut seinen Namen
Hiazt owa a ewig – Amen
Predigt:
Nix af da Wöt hot mea erregt
Hot Menschen Völker Mächt bewegt -
Ois des Wort vam Berg do oben
De Oamen und Gerechten loben
Politik und Spitzenschport
Und a de Wirtschoft hot des Wort –
Mode Buisness Industrie –
Wos do passiert des glauwast nie
Und wonn de Leit za d’ Woffn greufn
Um Jesu Wort si goa nix pfeuffn
Und wonn da Kriag mit Bombn tobt –
Vadienan si so monche Leit
Göd und Orden wia net gscheit
Da beste Füm wird nominiert
Mit monchem Oskar goa prämiert
Valiern des deaf fost nimma sei –
Do kunnt si jo da Siega gfrei
Und um die kraht donn boid koa Hohn
Vam Leben host donn nix mea davon
Host Jesu Jünger ois Voabüd?
De hom si sakrisch guat bemüht
A se hom gheat des Jesu Wort –
Und hom mit Eifa goa net gschpoat –
Woan fia de Oamen oiweu do
Mochan Behinderte und Kronke froh
De Bergpredigt ziagt große Kreise
Des gschpian a Kinda, Oide, Waise
Af da gonzn Wöt bewegt si wos
Durch’n Glauben is bestimmt wos los –
Weu net mea nua des Schtoake zöhlt
Wea des nu moat, der hot weit gföhlt
Der Friedensstifter, der is gfrogt
Dem Gerechtn is des Reich zuagsogt
So wiads im Lond wo Christn lebn
Vü Sochan fia de Oamen gebn
De Kronken kriagn a Kronkenhaus
Da Verfoigte, der kriagt vü Applaus
Und wea nix konn und wea nix hot –
Dem hüft ba d’ Christn gern da Schtoot
A Monn, dea sunst nua schtändig Treamt,
und moant, ea is goa nix und neamt,
Dea gschpiat ba Jesus neichn Muat
Ea glaubt und wieda gehts eam guat.
A Frau, de glaubt, sie wa nix weat,
weu ia scho längst neamt mea zuaheat,
die kimmt za unsam Gottesdienst –
und gschpiat, wia do a jeda grinst,
drausst am Kiachaplotz bleubts schteh
konn si noch longem wieda gfrei
weu d Leit de losn intressiert
wos ia im Leben is passiert.
So is duach enka Onteul nehma
Scho moncha wieda za uns kemma.
Und i mecht eich darum heite proin,
weu enka Glaube – tuat ma gfoin,
Und enka Mut eam auszudrüchn,
konn Gott und mi total beglückn.
Drum was a klass mia schtengan auf,
sogn in Glaubngod gonz eahli auf.
dabei owa net de Händ vaschrenka,
sonst kumnnt ma no beinohe denka,
dass es net kimmt aus tiafstn Heazn,
woin betn a und net nua scheazn…
Ich glaube an Gott
Fürbittn hom ma formuliert,
mia wissen, dass si Gott net ziat
drum schprech mas hiazt gonz deitli aus
Du moch fia uns des Besti draus
Olles wos uns liegt am Heazn –
olle Freid, a unsri Schmeazn
Moch Du es guat in Gottes Namen –
Fia uns und olli ondan---Amen
Gabengebet
Des Brot hiazt brecha und austeun
Des konn de Wöt vam Unrecht heun
Mitn Brot vawondl uns dazua
Zam Essn, trinken homm ma gnua
Dass ma Gott höfn mit vü Gfüh
Weu Hüfe braucht de Menschheit vü
Mia woin, dass Monna und a Damen
Du erlöst in Ewigkeit amen
Hochgebet
Wertvoi iss es, dir zu donken,
im festen Glauben ohne Wonken
weatvoi iss es, di zu loben,
bist ba uns, net woswoasi wo obn.
Wichtig iss es, di zam proin,
damit mochma uns söbst an Gfoin,
weu mia erinnan gean uns zrück,
wos Gott uns gebn hot - wiavü Glück.
Ea hot Jesus do af’d Eadn gschickt,
Und uns so menschlich liab onblickt,
Dea hot des Gotteswoat vakündet,
und hot sei Kiacha goa gegründet.
Dea hot fia uns brutal gelittn
Und is hiazt grod in unsra mittn.
Wea konn do hiazt nu ruhig sei,
wea schtimmt do net in Jubel ei?
De Engl und da Himmelschor,
de singan mit uns hell und klor
und mia woin uns gen Hümmi schwinga,
und kräftig laut mit eana singa
Vater unser Bitte
Des Betn host uns du beibrocht,
soin betn söbst ba Tog und Nocht,
und wia si des fia uns hoit gheat,
so bet ma, wias uns Jesus g’lehrt
Da Friedn fongt ba jedem on
Drum hüf ma Gott – so guat i konn
Dein Friedn Ondan weitaschenka,
loss mi Guat va olli denka
Wonn jeda do den Friedn teut,
donn wiad vom Hoss die Wöt nu gheut,
de Eandn wiad duach Di donn neich
da Friedn Christi sei mit Eich
SCHLUSSGEBET
mia woan ba Dia hiazt, Deine Gäst,
host eiglond uns zam Mega - Fest –
hom bet a wengal und a gsunga –
weu Du schtüsst oiweu unsan Hunga
nua Du bist unsa Sinn im Lebn,
gib Kroft, dass mia a weitagebn –
wos’d uns gschenkt duachs Sakrament
dass ma an uns dei Liab erkennt
dass niagandwo mehr Unrecht gschiacht
wonn jeda d’ Not da Ondan siacht –
donn trogt die Wöt schoboidDeinNamen
gib uns Kroft in Ewigkeit ---- Amen
